Kya ye bhi zindagi hai ke raahat kabhi na ho
Aisi bhi to kisi se mohabbat kabhi na ho

Waada zaroor karte haiN aate nahi kabhi
Phir ye bhi chaahate haiN shikaayat kabhi na ho

Shaam-e-wisaal bhi ye taghaaful ye be'rukhi
Teri razaa hai mujh ko masarrat kabhi na ho

Ehbaab ne diye haiN mujhe kis tarah fareib
Mujh sa bhi koi saada tabii'at kabhi na ho

Lab to ye keh rahe haiN ke uth, baRh ke choom le
AankhoN kaa ye ishaaraa ke jurr'at kabhi na ho

Dil chaahata hai phir wahii fursat ke raat din
Mujh ko to tere Khayaal se fursat kabhi na ho

 

 

Share this post